Shqipdon Aliu, i zhdukur tash e disa ditë, gjendet i vdekur

Shqipdon Aliu, i cili ishte zhdukur tash e disa ditë, raportohet të jetë gjetur pa shenja jete në fshatin Gadime e Ulët të komunës së Lipajnit.

Zëdhënësja e Policisë së Kosovës, Flora Ahmeti, ka treguar për mediat kosovare se trupi i pajetë është gjetur rreth orës 21:30 të hënën, përcjell albinfo.ch.

“Më 21.10.2019 rreth orës 21:30, në fshatin Gadime e Ulët të Lipjanit, saktësisht në një grop (te gurthyesi i vjetër) është gjetur një trup i pajetë. Ekipet e nevojshme policore janë në vendngjarje”, ka thënë Ahmeti për Insajderin.

“Bazuar në të dhënat fillestare dyshohet se bëhet fjalë për personin e raportuar të zhdukur më 14 tetor. Kanë qenë informacionet e qytetarëve ato që kanë ndihmuar policinë të gjejnë vendodhjen e personit, për çka i falënderojmë dhe vlerësojmë bashkëpunimin e tyre me Policinë e Kosovës”, ka shtuar Ahmeti.

23-vjeçari nga Lipjani ishte zhdukur tash e disa ditë nga familjarët e tij. Në media ishte raportuar se ai ishte djali i vetëm në familje.

Ndërsa para disa ditësh ish-deputeti i Kuvendit të Kosovës, Labinot Tahiri, kishte njoftuar se 23-vjeçarit i kishte vdekur babai.