Gjermania mbështet rindërtimin pas tërmetit me 4 milionë euro

Ambasada Gjermane në Shqipëri ka bërë të ditur se do ta ndihmojë Shqipërinë me katër milionë euro për rindërtimin e shtëpive pas tërmetit të tmerrshëm të 26 nëntorit, përcjell albinfo.ch.

Ky është njoftimi i plotë:

Sot ne informuam zyrtarisht qeverinë shqiptare: Qeveria Federale do të mbështesë rindërtimin pas tërmetit të tmerrshëm të 26 nëntorit me grante në shumën e 4 milionë euro përmes Bankës Gjermane për Zhvillim (KfW). Me të do të rindërtohen shkolla dhe ndërtesa publike në përputhje me standardet më të fundit të sigurisë dhe efiçencës së energjisë.

Në lidhje me këtë mbështetje, ambasadori gjerman në Shqipëri, z. Peter Zingraf, u shpreh: “Gjermania do të ndihmojë Shqipërinë për të rindërtuar shkollat dhe institucionet publike. Ky grant është një nga elementet e mbështetjes gjermane pas tërmetit të 26 nëntorit, i cili traumatizoi shumë shqiptarë dhe shqiptare. Rindërtimi do të shërbejë për rikthimin dalëngadalë në normalitin e jetës së përditshme“.