Shqipëri: Gjykata italiane kthen edhe një grup emigrantësh që u vendosën në kamp

Grupi i dytë i emigrantëve që erdhën javën e kaluar në qendrën e Gjadrit në Shqipëri do të kthehen sërish në Itali. Vendimi është marrë sot nga gjykata e Romës, e cila ka pezulluar masën e vlefshmërisë së ndalimit. Vendimi ka të bëjë me shtatë emigrantë, nga Egjipti dhe Bangladeshi, të cilët tashmë ndodhen brenda qendrës së paraburgimit italian për riatdhesimin në Gjadër dhe për rrjedhojë do të kthehen në vendin fqinj.

Me përfundimin e afateve të vlefshmërisë, shtatë të huajt do të duhet të largohen nga qendra e Gjadrit. Teksti i dispozitës së Seksionit XVIII të Imigracionit të Gjykatës së Romës “e referon çështjen në Gjykatën e Drejtësisë së Bashkimit Evropian, në përputhje me nenin 267 TFEU” dhe “pezullon aktgjykimin aktual që vërteton ndalimin pa paragjykuar efektet të ndalimit të përkohshëm të caktuar nga administrata me ligj”. Referenca, konkretisht, është te neni 6 i dekretit 142/2015 dhe te neni i Protokollit të Shqipërisë.

“Duhet theksuar se kriteret për përcaktimin e një shteti si vend të sigurt të origjinës përcaktohen nga ligji i Bashkimit Evropian. Prandaj, pa cenuar prerogativat e ligjvënësit kombëtarë, gjyqtari ka për detyrë të verifikojë gjithmonë dhe konkretisht – si në çdo sektor tjetër të sistemit juridik – zbatimin korrekt të së drejtës së Unionit, i cili mbizotëron mbi ligjin kombëtar kur është i papajtueshëm me të, siç parashikohet edhe nga Kushtetuta italiane”, thuhet në një shënim nga gjykata e Romës.

“Procedura e vlefshmërisë u pezullua sepse duhet pritur vendimi i Gjykatës Evropiane të Drejtësisë për pyetjet paraprake të propozuara edhe në lidhje me dekretin për “vende të sigurta”, thuhet ndër të tjera në dokument.

Edhe javët e fundit gjyqtarët e seksionit të specializuar të emigracionit të Gjykatës nuk kishin vërtetuar ndalimet e dhëna nga komisariati i Romës për emigrantët e parë që ishin sjellë në qendrën e paraburgimit për riatdhesim, e cila ishte ngritur në Shqipëri. Ky urdhër u kundërshtua nga Ministria e Brendshme me një ankesë në Gjykatën e Lartë/A2