“Shqipëria, së shpejti superfuqi energjitike në Ballkan”

Kryeministri, Sali Berisha garantoi të gjithë investitorët e huaj se çdo investim i tyre do të jetë një histori e vërtetë suksesi

Kryeministri i Shqipërisë, Sali Berisha deklaroi gjatë një seminari të organizuar në Tiranë nga Ministria e Ekonomisë, Tregtisë dhe Energjetikës se energjia e rinovueshme është një ndër prioritet madhore të qeverisë shqiptare dhe synimi kryesor i Shqipërisë është që të bëhet një superfuqi energjitike në rajon.“Fokusimi dhe përqëndrimi tek energjia e rinovueshme, përputhet plotësisht dhe tërësisht me prioritetet më madhore të qeverisë shqiptare. Shqipëria është një vend i vogël, por me burime të mëdha të energjisë së rinovueshme. Ky vend derdh në detrat e  Mesdheut, 6 herë më shumë ujëra sesa çka sipërfaqen e saj”, pohoi Berisha.

Në këtë takim, ku mori pjesë Zëvendës Drejtori i  Përgjithshëm  i  IFC  Lars Thunell, Ambasadori i Austrisë Florian Raunig, Përfaqësuesi i Komisionit të Delegacionit Europian Francois Begot dhe disa zëvëndësministra, Berisha u bëri apel të investitorëve që të konsiderojnë në mënyrë serioze financimin e projekteve të tyre në Shqipëri. “Unë ftoj gjithashtu bankat e mëdha, të ndjekin shembullin e IFC, të konsiderojnë seriozisht financimin e këtyre projekteve në sektorin privat, çka përbën një kontribut të madh të zhvillimit të qëndrueshëm të vendit, por dhe në potencialin e madh eksportues të Shqipërisë.  Shqipëria ka të gjitha kushtet, për tu bërë, dhe Shqipëria do të behet, një superfuqi e vogël  energjetike në rajon”, tha kryeministri i Shqipërisë.

Nga ana tjetër, Berisha siguroi investitorët se Shqipëria është e vendosur të përshtas çdo ligjë që favorizon bizneset e huaja për blerjen e energjisë së rinovueshme si dhe t’i jap garancitë më të mëdha të mundshme, biznesit dhe investimeve.. “Ne jemi të vendosur të adaptojmë sistemin ligjor më të mirë, për blerjen e energjisë së rinovueshme. Të japim garancitë më të mëdha të mundshme, biznesit dhe investimeve, por sot që ne diskutojmë , në raport me sigurinë e investimeve të huaja, Shqipëria renditet në një nga 15 vendet e para . Sot për investimet dhe klimën e investimeve në tërësi,  Shqipëria renditet  5 deri ne 7 % më lart se mesatarja e  vendeve të OECD . Për regjistrimin e biznesit Shqipëria renditet  27 % më lart, se mesatarja e vendeve të OECD”, shpjegoi ai.

Në fund, Sali Berisha garantoi të gjithë investitorët e huaj se çdo investim i tyre në Shqipëri, do të jetë një histori e vërtetë suksesi, jo vetëm për Shqipërinë, por para së gjithash për ata dhe për financimet e tyre.