Shqiptarët dhe serbët (ende) lakmojnë pasaportën zvicerane

Në kohën e rënies së interesimit për shtetësi zvicerane, shtimin më të madh 57%, e kanë shënuar shtetasit e Kosovës

Vitin që shkoi, ka pasur një rënie të ndjeshme të numrit të kërkesave për marrjen e shtetësisë zvicerane. 26102 veta, sipas Entit Federal për Migracion (BFM) kanë kërkuar gjatë vitit 2011 të natyralizohen, që krahasuar me vitin rekord, atë 2008, kur këtë e kishin bërë 34965, paraqet një rënie të madhe. Me gjithë këtë rënie, numri i tyre ende nuk ka rënë në nivelet e ulëta që kishte në fund të viteve 1990, kur bëheshin rreth 20.000 kërkesa të tilla.

Ndonëse më së shumti nga të huajt gjatë vitit 2011 janë natyralizuar shtetasit e Serbisë, gjithsej 4353, ky numër është për 36% më i vogël se ai i vitit të kaluar. Pas serbëve vijnë me radhë italianët me 4255 dhe gjermanët me 3686 natyralizime të reja.

Ndërsa shtimin më të madh të natyralizimeve krahasuar me vitin e kaluar, plot 57% ose gjithsej 2522 veta, e kanë shënuar shtetasit e Kosovës.   

Rënien më të madhe e kanë pësuar kërkesat për natyralizimin e rregullt. Sipas BFM-së, rënia ka të bëjë kryesisht me kriteret e ashpërsuara, siç është për shembull kriteri për njohjen e gjuhës. Nga ana tjetër, kërkesat për natyralizim të lehtësuar sikur ato për partnerët martesorë të shtetas/eve zviceranë/e nuk janë pakësuar.

Me gjithë faktin se kërkesat e regjistruara gjatë vitit 2011 kanë qenë të vogla, shtetësinë gjatë po atij viti e kanë fituar një numër më i madh të huajsh, gjegjësisht 37893 persona.

Duhet kuptuar se në këtë shifër hyjnë edhe ata të cilët kërkesën e kanë bërë viteve të kaluara dhe u është dashur të presin përfundimin e procedurës, e cila nganjëherë zgjatë edhe nga 2 e më shumë vite. Dhe, ky numër është për 6 për qind më i vogël se një vit më parë, kur shtetësia zvicerane u ishte dhënë 40 mijë të huajve.