Shqiptari Art Julius Aurel garon për zgjedhjet e Këshillit bashkiak të Gracit

Graci do të votojë më 26 shtator 2021. Njëri nga kandidatët shqiptarë që garon për Këshillin bashkiak të Gracit është edhe Art Julius Aurel. 29-vjeçari nga Kosova kërkon votën e bashkatdhetarëve tanë në Grac

Arti erdhi në Grac nga Kosova në moshën tetëvjeçar. Pas përfundimit të shkollimit  fillor, ai vazhdoi me përfundimin e një praktike (Lehre). Sot ai është në rrugën e tij të dytë të arsimimit dhe vijon studimet në Universitetin Karl-Franzens në Grac.

Arti i njeh mirë përpjekjet dhe sakrificën që duhet ta bëjë secili për të gjetur rrugën e tij në një qytet tjetër krejtësisht të ri dhe kur flitet një gjuhë krejt tjetër.

“Nuk është e lehtë për këdo që shkon në një vend të huaj si fëmijë i vogël ose më vonë si i rritur të bëjë një jetë më të mirë. Pavarësisht a je student, kërkon banesë apo punë: Duhet të punosh shumë për të arritur dhe për të bërë një jetë të mirë”, shpjegon Arti dhe thekson: “Por, ajo që më bën gjithmonë krenar është se ne kosovarët, për dallim nga të tjerët, nuk frikësohemi të ndërtojmë diçka nga fillimi, me duart tona, edhe nëse kjo kërkon shumë forcë dhe mundim”, ka thënë ai.

Arti prej vjetësh është anëtar i partisë ÖVP dhe merret kryesisht me temat e integrimit dhe jetesës. Edhe pse, sipas tij, shumë gjëra rrjedhin mirë në Grac, ai ndonjëherë ka ndjenjën se shumë njerëz që kanë ardhur kohët e fundit në Austri po lihen në baltë. Prandaj, Arti do të donte të shihte projekte më të mëdha nga qyteti i Gracit që do të lidhnin më mirë  komunitetet brenda Gracit.

“Përveç kësaj, duhet të ofrohen kurse të veçanta trajnimi që i marrin njerëzit aty ku janë dhe pastaj t’i afrojnë ata me gjuhën dhe vlerat austriake”, thotë 29-vjeçari.

Sipas Artit, ka ende shumë për të bërë edhe sektorin e banimit: “Është shumë e nevojshme që të merret një iniciativë për subvencionimin e banesave me qira të lira dhe në të njëjtën kohë që të ketë hapësirë të mjaftueshme për gjelbërim”, ka thënë ai.

“Graci ka nevojë për ide të reja, në mënyrë që qyteti ynë të mbetet po aq i dashur sa ne e njohim. Unë besoj në potencialin e madh të qytetit tonë dhe ne duhet të zgjidhim sfida vërtet të mëdha duke bashkëpunuar me njëri-tjetrin dhe duke ofruar ide të freskëta. Unë jam gati për këtë dhe kam nevojë për mbështetjen tuaj”, ka pohuar ai.

Arti kërkon votën e bashkatdhetarëve në Grac, duke premtuar se në rast se do të zgjidhet, ai do të jetë një zë i fuqishëm i komunitetit shqiptar në Këshillin bashkiak të Gracit.

---