Shqiptarja vritet nga ish-partneri në Kanada, ishte nënë e katër fëmijëve

29-vjeçarja shqiptare qëllohet për vdekje nga bashkëshorti

Mësohet se një ngjarje e rëndë ka tronditur komunitetin në Brampton, Ontario, ku një grua 29-vjeçare, Silvana Kulla, u vra me armë zjarri në parkingun e një qendre tregtare të martën pasdite, përcjell albinfo.ch.

Familjarët kanë konfirmuar se Kulla ishte nënë e katër fëmijëve të vegjël – tre djem dhe një vajze vetëm një vjeçare. Pas vrasjes, foshnja u mor nga i ati, 38-vjeçari Anthony Deschepper, duke shkaktuar një Alarm Amber në të gjithë provincën e Ontarios.

Sipas policisë, foshnja u gjet e sigurt pak më vonë në rajonin e Niagarës, pasi ishte lënë në kujdesin e të afërmve.

Ndërkohë, Deschepper, i dyshuar si autori i vrasjes, humbi jetën mëngjesin e së mërkurës pas një përplasjeje me policinë në një stacion karburanti në Niagara Falls.

Autoritetet kanadeze kanë bërë të ditur se një grua tjetër, e cila ishte duke drejtuar automjetin ku ndodhej Deschepper në momentin e ndërhyrjes, pritet të akuzohet për rolin e saj në ngjarje.

Policia e Peel-it e ka cilësuar rastin si një vrasje për shkak të dhunës, ndërsa Silvana Kulla është viktima e dhjetë e vrasjeve të regjistruara këtë vit në këtë rajon.

---