Shtatë kompani nga Kosova marrin pjesë në panairin ndërkombëtar “ProWein” në Gjermani

Prodhuesit kosovarë të verërave dhe rakisë do të prezantojnë produktet e tyre në një nga panairet më të mëdha të industrisë së pijeve në botë.

Shtatë kompani nga Kosovo, të cilat merren me prodhimin e pijeve alkoolike, do të marrin pjesë në panairin ndërkombëtar ProWein, që do të mbahet nga 15 deri më 17 mars në Düsseldorf, shkruan albinfo.ch.

Pjesëmarrja e kompanive kosovare është mbështetur nga Ministria e Industrisë, Ndërmarrësisë, Tregtisë dhe Inovacionit përmes KIESA, e cila ka siguruar një hapësirë ekspozuese prej 70 metrash katrorë për prezantimin e produkteve të tyre.

Gjatë këtij panairi, kompanitë nga Kosova do të promovojnë prodhimet e tyre të rakisë dhe verërave të ndryshme, duke pasur njëkohësisht mundësinë të njihen me trendet më të fundit të industrisë së verarisë dhe pijeve alkoolike në Evropë dhe më gjerë.

ProWein konsiderohet një nga panairet më të mëdha dhe më të rëndësishme në botë në këtë sektor, duke mbledhur çdo vit prodhues, distributorë dhe profesionistë të industrisë nga shumë vende të botës. Pjesëmarrja në këtë ngjarje pritet të krijojë mundësi të reja bashkëpunimi dhe zgjerimi për kompanitë kosovare në tregjet ndërkombëtare./Albinfo.ch

---