Shtohen dyshimet për zgjerimin e rrjetit rrugor në Zvicër

Sipas kritikëve, zgjerimi i autostradave mund të nxisë rritjen e trafikut në afat të gjatë dhe të ketë pasoja negative për mjedisin

Kritikat ndaj planeve për zgjerimin e infrastrukturës rrugore në Zvicër po shtohen, ndërsa organizata dhe ekspertë të transportit shprehin shqetësime se projektet e reja nuk pasqyrojnë vullnetin e qytetarëve të shprehur në referendumin e vitit 2024, kur votuesit hodhën poshtë zgjerimin e disa autostradave kombëtare.

Në kantonin e Ticinos, debatet janë përqendruar te projekti PoLuMe, që parasheh zgjerimin e autostradës A2 ndërmjet Luganos dhe Mendrisios.

Komisionet rajonale të transportit kërkojnë që ky projekt të mbetet prioritet në strategjinë federale të transportit deri në vitin 2045, por kjo qasje po kundërshtohet nga Shoqata për Trafikun dhe Mjedisin (ATA), e cila vlerëson se autoritetet nuk po respektojnë mjaftueshëm rezultatin e referendumit, transmeton albinfo.ch.

Sipas kritikëve, zgjerimi i autostradave mund të nxisë rritjen e trafikut në afat të gjatë dhe të ketë pasoja negative për mjedisin, ndërsa ata kërkojnë që investimet të orientohen më shumë drejt transportit publik dhe zgjidhjeve të qëndrueshme të mobilitetit. Nga ana tjetër, përkrahësit e projektit argumentojnë se infrastruktura aktuale është e mbingarkuar dhe se zgjerimi do të ndihmonte në uljen e kolonave dhe përmirësimin e qarkullimit në rajonet më të prekura.

Debati pritet të vazhdojë edhe në muajt në vijim, ndërsa autoritetet federale do të vendosin për prioritetet e investimeve në rrjetin kombëtar të transportit.

---