Shumica për iniciativën kundër zhvatësve

54 % të të anketuarve janë shprehur pro dhe 30 % kundër. Ndërsa 16 për qind e të pyeturve nuk kanë ende ndonjë mendim të qartë rreth kësaj

Një nga iniciativat për referendum në nivel të Zvicrës që kanë ngjallur më së shumti debat viteve të fundit është e ashtuquajtura “Iniciativa kundër zhvatësve”. Ajo drejtohet kundër pagave astronomike të menaxherëve të lartë në kompanitë e mëdha zvicerane.

Shtatë javë para mbajtjes së referendumit, sondazhi më i ri tregon për një mbështetje të mirë që gëzon iniciativa në mesin e popullit me të drejtë vote. 54 për qind të të anketuarve nga “SonntagsBlick” i kanë dhënë mbështetje asaj, ndërkohë që 30 % janë kundër. Ndërsa 16 për qind e të pyeturve nuk kanë ende ndonjë mendim të qartë rreth kësaj. 

Gjithsej janë pyetur 1019 persona me të drejtë vote dhe sondazhi është bërë nga e enjtja deri në të dielën, e javës që kaloi. Po ashtu të anketuarit janë pyetur nëse do të dalin ose jo në referendum. 686 prej tyre kanë thënë se “me siguri” ose “shumë e mundur” do të dalin.

Sipas një analize të rezultateve del se në Zvicrën gjermane përqindja e përkrahësve të iniciativës është 53% ndërsa në atë franceze 55%. Kundërshtarë të saj janë 32% në Zvicrën gjermane ndërsa 26% në Zvicrën franceze.

Nga aspekti i përcaktimit partiak, te socialdemokratët janë më të shumtë përkrahësit e iniciativës, të cilët përbëjnë 69%.