Si dyshohet se transportonte narkotikët asamblisti i LVV-së?

Policia e Shqiperise

Në një konferencë për media, drejtori i Drejtorisë së Policisë së Tiranës, Tonin Vocaj, ka folur lidhur me operacionin “Punisher 2”, nga ku mbeti i arrestuar asamblisti i Lëvizjes Vetëvendosje, Besnik Mujeci.

“Drejtoria Vendore e Policisë Tiranë, në vijim të operacioneve të njëpasnjëshme të zhvilluara për parandalimin, evidentimin dhe goditjen e veprimtarisë kriminale në fushën e narkotikëve, në vijim të veprimeve të thelluara në drejtim të hetimit të furnitorëve për grupin e arrestuar në janar, kanë rënë në gjurmët e një rrjeti që trafikonte sasi të mëdha droge sintetike nga Kosova në Shqipëri”, ka thënë Vocaj, përcjell albinfo.ch.

Drejtori ka publikuar edhe emrat e të arrestuarve që dyshohet se bashkëpunonin në këtë lloj trafiku droge.

“Mbi bazën e provave të siguruara gjatë hetimit, u organizua dhe u finalizua operacioni policor i koduar “PUNISHER 2”, në kuadër të të cilit u vunë në pranga shtetasit: Mithat Ramadani, 30 vjeç, Besnik Mujeci, 40 vjeç, të dy banues në Prishtinë, si dhe Kalem Picari, 24 vjeç, Ambra Myftari, 28 vjeçe dhe Daniel Avdija, 26 vjeç, të tre banues në Tiranë. Shtetasit e arrestuar janë lokalizuar në kryqëzimin e rrugës “Myslym Shyri” dhe “Sami Frashëri”, së bashku me dërgesën me lëndë të dyshuar narkotike, prej 11300 tabletash ekstazi MDMA, me peshë 5.093 kg dhe vlerë tregu rreth 400 mijë euro”, përcjell albinfo.ch.

Tutje, në mënyrë të detajuar, drejtori i Policisë së Tiranës ka treguar se si të dyshuarit kanë transportuar me autobusë narkotikët.

“Nga hetimet ka rezuluar se këta shtetas, duke shfrytëzuar fluksin e sezonit turistik i kalonin dërgesat nëpërmjet linjave të autobusëve Prishtinë-Tiranë. Pasi dërgesat arrinin në Tiranë, transportoheshin me autovetura të marra me qira në Tiranë dhe në qytete të tjera, kryesisht bregdetare, dhe vendet e shkëmbimit caktoheshin në vende publike me shumë lëvizje dhe fluks njerëzish. Për arritjen e marrëveshjeve me shpërndarësit e drogave sintetike në Shqipëri, trafikantët kërkonin pagesa paradhënie, ose edhe lënien e automjeteve si garanci. Tabletat e ekstazisë MDMA, së bashku me një sasi lënde narkotike kanabis, një automjet, si dhe 5 aparate celulare, u sekuestruan në cilësinë e provës materiale”, ka treguar Vocaj, përcjell albinfo.ch.