Sindikatat kërkojnë rritje të përgjithshme të pagave me 2.5% në Zvicër për vitin 2027

Unioni Sindikal Zviceran argumenton se pagat duhet të rriten për të kompensuar shtrenjtimin e jetesës, rritjen e primeve të sigurimit shëndetësor dhe për të reflektuar rritjen e produktivitetit

Unioni Sindikal Zviceran (USS) ka kërkuar një rritje të përgjithshme të pagave prej 2.5% për vitin 2027. Sipas sindikatës, kjo kërkesë mbështetet në zhvillimin e dobët të pagave gjatë dekadës së fundit, perspektivën më të mirë ekonomike dhe nevojën për të mbrojtur fuqinë blerëse të punonjësve.

Presidenti i USS-së, Pierre-Yves Maillard, tha se një pjesë gjithnjë e më e madhe e popullsisë po e ka të vështirë të kursejë. Ai veçoi rritjen e vazhdueshme të primeve të sigurimit shëndetësor si një nga faktorët kryesorë që po rëndojnë buxhetet familjare, transmeton albinfo.ch.

Pagat nuk kanë ndjekur produktivitetin

Sipas USS-së, që nga viti 2016 produktiviteti në Zvicër është rritur mesatarisht me rreth 1% në vit, ndërsa pagat reale nuk kanë ecur me të njëjtin ritëm. Sindikata pretendon se, nëse produktiviteti do të reflektohej plotësisht në paga, paga mediane mujore do të ishte rreth 7,731 franga, në vend të 7,235 frangave – një diferencë prej afro 500 CHF në muaj.

USS e zbërthen kërkesën prej 2.5% duke marrë parasysh rreth 0.6% për kompensimin e inflacionit, 0.3% për efektin e rritjes së primeve të sigurimit shëndetësor dhe 1% për rritjen e produktivitetit, krahas synimit për përmirësimin e pagave të ulëta. Sindikata kërkon gjithashtu që personat që kanë përfunduar një praktikë profesionale të kenë paga prej të paktën 5,000 frangash në muaj.

Në sektorin e transportit publik, kërkesat ndryshojnë sipas ndërmarrjeve, por lëvizin kryesisht ndërmjet 2% dhe 3%.

Nga ana tjetër, punëdhënësit kanë një vlerësim dukshëm më të përmbajtur: Unioni Zviceran i Punëdhënësve citon një parashikim të KOF-it për rritje nominale të pagave prej rreth 1% në vitin 2027, me inflacion të parashikuar rreth 0.6%.

---