Sot mbahet mbledhja komemorative “Alban Bujari, fotoreporteri i së vërtetës”

Sot në Bibliotekën Kombëtare në Prishtinë, nga ora 12:00, do të mbahet mbledhja komemorative “Alban Bujari, fotoreporteri i së vërtetës” në nderim të veprës dhe jetës së fotoreporterit Alban Bujari.

Fotoreporteri i Grupit KOHA, Alban Bujari, vdiq në mbrëmjen e 27 shkurtit pa i mbushur 55 vjet.

Në mbledhjen komemorative të hënën do të shfaqet dokumentari për Bujarin, “Dokumentuesi i luftës dhe i paqes”.

Alban Bujari ishte pjesë e ekipit të KOHËS që kur nisi karrierën e tij në të përditshmen “Koha Ditore” në vitin 1997.

Ai ishte pjesë e grupit të fotoreporterëve kosovarë që kanë përcjellë zhvillimet politike dhe sociale në fundvitet e ’90-ta, veçanërisht luftën mes UÇK-së dhe forcave serbe, si dhe krizën humanitare të refugjatëve shqiptarë të Kosovës.