Sot mbahet seancë e jashtëzakonshme për FSK-në

Kuvendi i Kosoves

Sot do të mbahet seancë e jashtëzakonshme, për debat parlamentar për mungesën e ushqimit në Ushtrinë e Republikës së Kosovës.

Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, tha se janë mbledhur 43 nënshkrime nga deputetët për këtë seancë, e propozim-rezoluta është që me urgjencë të zgjidhet kjo çështje.

“Me kërkesë të Grupit Parlamentar të AAK-së, të mbështetur nga 43 deputetë nënshkrues, do të mbahet një seancë e jashtëzakonshme për problemin e furnizimit me ushqim për Ushtrinë e Kosovës. Propozim Rezoluta është e thjeshtë: ‘Kuvendi i Republikës së Kosovës e obligon Qeverinë, Ministrinë e Mbrojtjes, që me urgjencë ta zgjidhë çështjen e furnizimit me ushqim si dhe me të gjitha pajisjet tjera të nevojshme’. Nesër Kuvendi do të obligojë Qeverinë të zgjidhë këtë çështje. Për sqarim: ky draft i Rezolutës mund të plotësohet nga deputetët në seancë”, ka shkruar ai të dielën në Faceboook.