Sot po mbahen zgjedhjet në Shqipëri që po bojkotohen nga opozita

Zgjedhjet lokale po monitorohen nga 150 vëzhguese të OSBE/ODIHR si edhe nga misionet e ambasadave të huaja

Sot në Shqipëri mbahen zgjedhjet lokale, nën hijen e përçarjeve më të mëdha politike në Shqipërinë pluraliste.

Votuesit do të kenë mundësi që të drejtohen të kutitë e votimit nga ora 07:00 deri në ora 19:00, kur mbyllen qendrat e votimit, shkruajnë mediat shqiptare.

Partia Socialiste është e vendosur që këto zgjedhje të mbahen sot, ndërsa opozita e udhëhequr nga Paria Demokratike dhe Lëvizja Socialiste për Integrim, i kanë braktisur zgjedhjet, përcjell albinfo.ch.

Opozita e bashkuar u ka bërë në vazhdimësi thirrje qytetarëve që të mos marrin pjesë në zgjedhje, pasi pretendon se së pari duhet të dënohen vjedhësit e votave, për të cilën e akuzojnë kryeministrin shqiptar Edi Rama.

Pas shumë protestave të mbajtura nga opozita, presidenti shqiptar Ilir Meta ka shfuqizuar dekretin e zgjedhjeve të 30 qershorin, por këtë vendim nuk e njeh kryeministri Edi Rama.

Meta po ashtu ka caktuar 13 tetorin si datë të zgjedhjeve lokale, por sërish këtë datë nuk e njeh Edi Rama.

Bashkësia ndërkombëtare ka bërë thirrje që zgjedhjet të zhvillohen të qeta dhe kanë paralajmëruar se nuk do të tolerohet dhuna.

---