Sot arrijnë në Kosovë mbi 500 mijë doza të vaksinës, donacion i SHBA-së

@pixabay

Ministria e Shëndetësisë ka njoftuar se sot në Kosovë do të arrijnë 514 mijë e 970 doza të vaksinës Pfizer, të siguruara për Kosovën nga Presidenti i Shteteve të Bashkuara të Amerikës, Joe Biden, përcjell albinfo.ch.

Në njoftimin e MSH-së bëhet e ditur se vaksinat në Kosovë kanë arritur përmes mekanizmit COVAX.

“Në Institutin Kombëtar të Shëndetësisë Publike të Kosovës do të mbahet sot ceremonia e pranimit të 515, 970 dozave të vaksinës Pfizer, të siguruara nga Presidenti i SHBA-së, Joe Biden, për popullin e Kosovës, të cilët në vendin tonë kanë arritur përmes mekanizmit COVAX”, ka bërë të ditur MSH-ja.

Në ceremoninë e pranimit të vaksinave do të marrin pjesë ambasadori i SHBA-së në Kosovë, Jeffrey Hovenier, Presidentja Vjosa Osmani, Kryeministri Albin Kurti, ministri i Shëndetësisë, Rifat Latifi, e të tjerë.

Ceremonia e pranimit të vaksinave fillon në orën 14:00, në hapësirat e Institutit Kombëtar të Shëndetësisë Publike të Kosovës.