Spitalet në Kroaci në alarm, nuk kanë shtretër të lirë

Raportohet se pacientët me sëmundje Covid-19 presin orë të tëra në spital sepse nuk ka vende të disponueshme

Shoqata Kroate e Mjekëve (HUBOL) është e shqetësuar për kërcënimin e mbipopullimit për shkak të pacientëve të sëmurë rëndë Covid-19.

”Sistemi shëndetësor kroat nuk ekziston më. Sistemi nuk ekziston kur keni nevojë për të njohur dikë për t’u kuruar në një shtrat me aparatura oksigjeni”, theksoi në një deklaratë HUBOL.

”Ndërsa pacientët me sëmundje Covid-19 presin orë të tëra në spital, sepse nuk ka vende të disponueshme, zyrtarët e lartë të qeverisë u qasen problemeve si adoleshentët arrogantë narcistë”, shtoi shoqata, raportojnë mediat e huaja, transmeton Albinfo.ch.

Aktualisht janë 1 418 pacientë me koronavirus në trajtim spitalor në Kroaci, 170 prej të cilëve janë në intubim.

Incidenca shtatëditore është rritur në vend në dy javët e fundit, në 587,9 infeksione të reja për 100 000 banorë, sipas universitetit ”Johns Hopkins” në SHBA.

Në Kroaci, 52,6% e popullsisë ka mbrojtje të plotë nga vaksinimi.

 

---