Spitalet zvicerane përmirësojnë financat, por situata mbetet e vështirë

Gjendja financiare e spitaleve në Zvicër është përmirësuar gjatë vitit 2025, por sektori shëndetësor vazhdon të jetë nën presion. Më shumë se 80% e spitaleve të kujdesit akut nuk arrijnë ende nivelin financiar që konsiderohet i nevojshëm për funksionim të qëndrueshëm

Sipas analizës së shoqatës SpitalBenchmark, e cila përfshin më shumë se 90% të spitaleve zvicerane, marzhi mesatar EBITDA – të ardhurat pasi zbriten kostot operative – u rrit nga 4% në 5.6% gjatë vitit 2025, transmeton albinfo.ch.

Megjithatë, ky nivel mbetet dukshëm nën 10%, që konsiderohet i nevojshëm për një funksionim të qëndrueshëm financiar në afat të gjatë.

Sipas Anne-Geneviève Bütikofer, drejtoreshë e shoqatës së spitaleve H+, katër nga pesë spitale ende nuk gjenerojnë burime të mjaftueshme për investimet e nevojshme në personel, teknologji dhe infrastrukturë. Për këtë arsye, pavarësisht përmirësimit të regjistruar, sektori është ende larg një kthese të qëndrueshme financiare.

Më shumë trajtime ambulatore për të ulur kostot

Spitalet synojnë të zgjerojnë trajtimet ambulatore si një mënyrë për të frenuar kostot e sistemit shëndetësor. Megjithatë, ato theksojnë se ky transformim kërkon financim të mjaftueshëm dhe kushte të përshtatshme.

H+ ka kritikuar në këtë kontekst planin e Këshillit Federal për të kufizuar në 4% rritjen e kostove ambulatore. Sipas organizatës, një kufizim i tillë mund të pengojë pikërisht kalimin nga trajtimet spitalore në ato ambulatore dhe të vështirësojë financimin e investimeve të nevojshme.

Përmirësimi i rezultateve financiare është një sinjal pozitiv, por të dhënat tregojnë se shumica dërrmuese e spitaleve zvicerane vazhdojnë të përballen me sfida serioze financiare.

---