Stadiumi i Napolit merr emrin e Maradonës

Në vitin 1987 argjentinasi i dha klubit italian titullin e parë të kampionit në histori. Tani emri i tij është përjetësuar në një mënyrë të veçantë

Pas vdekjes së legjendës së futbollit argjentinas Diego Maradona, qyteti jugor italian i Napolit vendosi t’ia kushtojë stadiumin ish-lojtarit të SSC Napoli. Kështu ky stadium do të riemërtohet nga “Stadio San Paolo” në “Stadio Diego Armando Maradona”, kanë bëre të ditur të premten autoritetet e qytetit.

Në aktin zyrtar, Maradona është identifkuar si “futbollisti më i mirë i të gjitha kohërave”, transmeton albinfo.ch.

Kryetari i Napolit Luigi de Magistris kishte sugjeruar në Twitter menjëherë pas vdekjes së Maradonës javën e kaluar që stadiumi të riemërtohej në kujtim të gjeniut të futbollit.

Lojtari ofensivë i gjatë vetëm 1.65 metra ka luajtur për SSC nga viti 1984 deri në vitin 1991. Me të, klubi fitoi Kupën Uefa në vitin 1989 dhe u bë kampion i Italisë në vitin 1987 dhe 1990.

Më shumë se thjesht një futbollist

Që atëherë, Maradona gëzonte statusin e kultit në Napoli. “Askush përveç tij nuk ka arritur të identifikohet me trup dhe shpirt në një mënyrë të tillë me Napolin”, ka thënë de Magistris.

Pas vdekjes së Maradonës, qindra njerëz ishin bashkuar në stadium dhe në pjesë të ndryshme të Napolit për të mbajtur zi, megjithë ndalimin e rreptë, për shkak të koronës.

Maradona vdiq të mërkurën, javën e kaluar në moshën 60 vjeçare.

---