Studentët në Kosovë do të protestojnë për liberalizimin e vizave

Mos heqja e vizave për qytetarët e Kosovës, si vendi i fundit që nuk e gëzon këtë të drejtë në rajon, ka shtyrë Parlamentin Studentor të Universitetit të Prishtinës që të organizojë sërish një protestë për datën 10 janar.

Në një konferencë për media, Arben Elshani, kryetar i Parlamentit Studentor, tha se synojnë që marshit për liberalizimin e vizave të enjten duke filluar nga ora 12.00, t’i bashkëngjiten shumë qytetarë.

Ai porositi Bashkimin Evropian që të reflektojnë ndaj kërkesave të kosovarëve, e veçanërisht të studentëve për liberalizimin e vizave.

Ndërsa, Jehona Gashi, kryetare e Këshillit studentor në Fakultetin e Filologjisë, tha se në marshin protestues për viza duhet të bashkohen të gjithë qytetarët, shkruajn mediat kosovare, përcjell albinfo.ch

Kosova ka arritur të marrë rekomandimin pozitiv të Komisionit Evropian për liberalizim të vizave, ku më pastaj Parlamenti Evropian kishte aprovuar rekomandimin për vizat. Mirëpo, çështja e vizave nuk ka arritur të futet në agjendën e Këshillit të Ministrave të BE-së.

Pavarësisht përmbushjes së 95 kritereve të kërkuara nga ana e vendeve të Bashkimit Evropian, duke përfshirë edhe demarkacionin me Malin e Zi, komisionari evropian për Zgjerim, Johannes Hahn, si datë kur potencialisht mund të hiqen vizat, ka dhënë vitin 2020.