Stuhi të fuqishme godasin Gjermaninë, një viktimë dhe dëme të mëdha materiale

Stuhi të fuqishme kanë përfshirë gjatë natës disa pjesë të Gjermanisë, duke shkaktuar dëme të konsiderueshme materiale dhe duke lënë të paktën një person të vdekur.

Sipas policisë, në Waldorf të landit Rheinland-Pfalz, një grua humbi jetën pasi u godit nga një pemë që u rrëzua gjatë stuhisë. Një grua tjetër pësoi lëndime të rënda, përcjell albinfo.ch.

Dy gratë, të moshës 58 dhe 47 vjeç, kishin dalë së bashku për shëtitje kur filloi moti i keq. Ato kishin kërkuar strehim pranë një hapësire të mbuluar për t’u mbrojtur nga stuhia, por u goditën nga pema që u rrëzua.

Erërat rrëzuan pemë dhe dëmtuan ndërtesa

Dëme të mëdha janë raportuar edhe në Höhr-Grenzhausen, jo shumë larg Waldorfit. Sipas raportimeve nga vendi i ngjarjes, stuhia ka dëmtuar rëndë të paktën dy ndërtesa, ndërsa pjesë të fasadave dhe objekte të ndryshme janë shkëputur dhe janë përhapur nga era.

Në shumë zona janë rrëzuar pemë. Në autostradën A61, një kamion është përmbysur si pasojë e erërave të forta.

Ndërhyrje të shumta të shërbimeve emergjente janë regjistruar gjatë natës edhe në landet Hessen, Thüringen, Brandenburg dhe Bayern.

Rreth 60 shtëpi të dëmtuara në Wetzlar

Situatë veçanërisht e rëndë është raportuar në Wetzlar të Hessenit, ku sipas zjarrfikësve janë dëmtuar rreth 60 shtëpi.

Dëmet variojnë nga tjegulla të shkëputura deri te çatitë e dëmtuara plotësisht. Në disa raste, pjesë të çative janë bartur nga era deri në 100 metra larg.

Edhe në Solms janë dëmtuar disa shtëpi. Policia dyshon se dëmet janë shkaktuar nga një vorbull e fuqishme ere. Në disa ndërtesa janë ngritur pjesë të tëra të konstruksionit të çatisë, ndërsa disa shtëpi janë bërë përkohësisht të pabanueshme.

Dëme edhe në Bavari

Moti i keq ka shkaktuar probleme edhe në rajonin Unterfranken të Bavarisë. Disa automjete janë dëmtuar, ndërsa pemë të shumta janë rrëzuar mbi rrugë.

Sipas policisë, në këtë rajon nuk janë raportuar persona të lënduar.

Autoritetet dhe ekipet emergjente kanë vazhduar ndërhyrjet për largimin e pemëve dhe mbetjeve nga rrugët, si dhe për sigurimin e ndërtesave të dëmtuara.

 SRF / DPA

---