Suedia është pro liberalizimit të vizave për Kosovën

Kryeparlamentari i Suedisë, Urban Ahlin tha se numri i azilkërkuesve kosovarë në Suedi është rritur, por kjo nuk e pengon që ky shtet ta mbështet liberalizimin e vizave

Suedia mbështet liberalizimin e vizave dhe procesin integrues të Kosovës në Bashkimin Evropian pavarësisht numrit të madh të azilkërkuesve në vendet e BE-së. Kështu ka deklaruar kryetari i Parlamentit të Suedisë, Urban Ahlin, i cili ndodhet për vizitë zyrtare në Prishtinë.

Ai i shoqëruar edhe nga deputeti me origjinë nga Kosova, Adnan Dibrani, u prit sot nga kryeparlamentari kosovar, Kadri Veseli dhe nënkryetarët e Kuvendit të Kosovës.

Të dy homologët biseduan për raportet e mira që parlamentet e të dyja vendeve kanë ndërmjet tyre, ndërsa u shtrua nevoja që ky bashkëpunim të thellohet edhe më tej në të gjitha nivelet e jetës parlamentare, posaçërisht në fushën e komisioneve dhe të administratave.

Kryeparlamentari Veseli e njoftoi kryeparlamentarin Ahlin edhe për zhvillimet aktuale në Kosovë, me punën në procesin e liberalizimit të vizave, përpjekjet për njohje të reja dhe anëtarësim në një varg organizatash ndërkombëtare.

Nga ana e tij, kryetari i Parlamentit të Suedisë, Urban Ahlin, vizitën e tij në Kosovë dhe në Kuvendin e saj, e konsideroi një mundësi për të kontribuar më shumë në forcimin dhe avancimin e mëtejmë të marrëdhënieve që tashmë të dy shtetet dhe parlamentet respektive kultivojnë ndërmjet tyre.

Ahlin vlerësoi lart hapat zhvillimorë që ka bërë Kosova në të gjithë fushat, ndërsa shprehu gatishmërinë e shtetit të tij për ta vazhduar mbështetjen për Kosovën edhe në të ardhmen.

“Ne si shtet i Suedisë, i qëndrojmë ende prapa Kosovës dhe dëshirojmë ta përkrahim atë në të gjitha proceset e saj”, theksoi Ahlin. Ky i fundit po ashtu tha se Suedia e përkrahë procesin e liberalizimit të vizave në Kosovës dhe procesin e integrimit të saj si dhe të vendeve të tjera të cilat dëshirojnë të bëhen pjesë e BE-së.

Suedia, sipas tij, dëshiron që të gjithë popujve t’iu jepet mundësia që të lëvizin lirshëm. “Është e vërtetë që e kemi parë një ngritje të numrit të azilkërkuesve nga Kosova dhe ne jemi duke e trajtuar këtë çështje, por ju duhet ta dini se Suedia e përkrah liberalizimin për Kosovën dhe vendet e tjera të Ballkanit”, deklaroi ai.

Kryeparlamentari suedez u takua edhe me kryeministrin Isa Mustafa dhe presidenten Atifete Jahjaga.

Presidentja Jahjaga dhe Kryetari i Parlamentit të Suedisë, Ahlin, biseduan edhe për dialogun midis Republikës së Kosovës dhe asaj të Serbisë, dhe u dakorduan se përpos arritjes së marrëveshjeve për normalizimin e marrëdhënieve midis dy shteteve, është shumë i rëndësishëm angazhimi konkret për implementimin e tyre në praktikë.

Ahlin theksoi se Suedia është përkrahëse e politikës së zgjerimit të BE-së dhe mbështet procesin e liberalizimit të vizave për Kosovën. Ai theksoi se migrimi ilegal ka vështirësuar këtë proces, por gjithashtu tha se Kosova duhet të përmbushë të gjitha kriteret në kuadër të këtij dialogu.