Sulm kibernetik ndaj SRG-së, vidhen të dhënat e rreth 340 punonjësve

Rreth 340 punonjës aktualë dhe ish-punonjës të SRF-së, pjesë e Korporatës Zvicerane të Transmetimeve (SRG), janë prekur nga një sulm kibernetik, gjatë të cilit janë vjedhur të dhëna personale dhe profesionale.

Sipas SRG-së, të dhënat e komprometuara përfshijnë kryesisht emra, pozita dhe informacione kontakti profesionale, ndërsa në disa raste edhe të dhëna private kontakti. Informacionet datojnë nga viti 2020 dhe lidhen kryesisht me njësinë “Information”.

SRG ka bërë të ditur se deri tani nuk ka prova që të dhënat të jenë publikuar apo keqpërdorur. Gjithashtu, nuk ka indikacione se janë prekur fjalëkalimet, të dhënat bankare e financiare, burimet gazetareske, të dhënat e hulumtimeve apo përmbajtja e komunikimeve.

Pas zbulimit të sulmit, SRG ka çaktivizuar llogaritë e prekura dhe ka marrë masa shtesë sigurie. Punonjësit e prekur janë informuar drejtpërdrejt.

Incidenti po hetohet nga ekspertë të brendshëm dhe të jashtëm, ndërsa SRG ka njoftuar autoritetet dhe ka bërë kallëzim në polici. Hetimi synon të përcaktojë shkaqet e sulmit dhe shtrirjen e plotë të të dhënave të komprometuara.