Sulmohet seksualisht alpinistja Mrika Nikçi, arrestohet sulmuesi

UNwomen

Alpinistja Mrika Nikçi është sulmuar seksualisht nga një person me inicialet F.B, i cili është arrestuar sot nga Policia e Kosovës dhe është dërguar në mbajtje për 48 orë.

Nikçi përmes një shkrimi në Facebook, pasditën e së premtes ka bërë të ditur se i dyshuari, me inicialet F.B, vjen nga një familje e njohur e qytetit të Pejës.

“Si pasojë e kësaj situate, për momentin jam në gjendje të rëndë emocionale dhe nuk mund të deklarohem në tërësi. Pas vendimit të plotfuqishëm të Gjykatës do të ju njoftoj për rrjedhën e situatës dhe sulmuesin e paskrupullt. Në videon e bashkangjitur, e gjykoni vetë këtë gjest të shëmtuar, viktimë e të cilit ka mundur të jetë çdo familjarë i juaji”, ka thënë ajo.

Ndërkaq, Policia ka lajmëruar se i dyshuari tashmë është arrestuar dhe është dërguar në mbajtje. Prokuroria kanë konfirmuar se rasti ka ndodhur me datën 27 shtator dhe është arrestuar pas identifikimit, ndërsa po shqyrtohet paraqitja e kërkesës për caktimin e masës së paraburgimit.

Mrika Nikçi është nga Peja dhe njihet si vajza më e re në botë që u ngjit në majat më të larta në shtatë kontinente, përcjell tutje albinfo.ch