Sunny Hill 2025: Dua Lipa, Shawn Mendes dhe Fatboy Slim në listën e yjeve të konfirmuar

Foto: Albinfo.ch

Festivali “Sunny Hill” ka zbuluar artistët e rinj që do të performojnë në edicionin e këtij viti.

Pas konfirmimit të Dua Lipës si ylli kryesor, organizatorët njoftuan të premten se do t’i bashkohen edhe Shawn Mendes, Anyma, Mochakk, Fatboy Slim dhe artistë të tjerë, shkruan albinfo.ch.

Dua Lipa do të hapë festivalin më 1 gusht, ndërsa pas saj do të ngjitet në skenë DJ i njohur Fatboy Slim, fitues i 6 çmimeve MTV VMA.

Më 2 gusht do të performojë Shawn Mendes, një nga zërat më të mëdhenj të muzikës pop ndërkombëtare, ndërsa në skenën C4 do të vijojë DJ braziliani Mochakk me stilin e tij funky dhe energjik.

Në natën finale, performanca audiovizuale e Anyma-s, projekti solo i Matteo Millerit, do të jetë atraksioni kryesor, ndërsa në skenën C4 festivali do të përmbyllet me setin e DJ Peggy Gou.

Përveç këtyre artistëve, festivali do të përfshijë edhe emra të tjerë vendorë dhe ndërkombëtarë, të cilët do të njoftohen së shpejti, transmeton albinfo.ch.