Tahiri: Pesë vrasje në 48 orë, pasqyra më e qartë e dështimit të shtetit

Deputeti i Partisë Demokratike të Kosovës (PDK), Abelard Tahiri, ka deklaruar të martën se pesë vrasjet e rënda të ndodhura brenda 48 orëve të fundit tregojnë, sipas tij, “dështimin e plotë të shtetit për të mbrojtur jetën e qytetarëve”, raporton albinfo.ch.

Në një konferencë për media, Tahiri e akuzoi pushtetin në largim për krijimin e një gjendjeje alarmante të sigurisë, ku, siç tha ai, “po mbretërojnë bandat kriminale të inkurajuara dhe të mbrojtura nga vetë pushteti”.

“Bandat kriminale, narkotrafikantët, fajdexhinjtë, janë bërë të guximshëm dhe kanë lidhje të drejtpërdrejta me pushtetin, duke krijuar një zinxhir të rrezikshëm mes krimit, politikës dhe institucioneve ligjzbatuese. PDK u shpreh ngushëllime të thella familjeve që kanë humbur më të dashurit nga këto vrasje dhe shpreh shqetësimin e madh për dështimin e organeve të rendit për të garantuar sigurinë e qytetarëve”, u shpreh Tahiri.

Ai përmendi rastin e prezencës së Mefail Shkodrës, për të cilin tha se “nuk është i ftuar nga opozita, por nga pushteti”, duke akuzuar se ky person ka “terrorizuar një qytet të tërë” me mbështetjen e strukturave qeveritare.

“Përgjegjës direkt për humbjen e këtyre jetëve është Qeveria”, tha ai, duke e cilësuar situatën si një “thirrje alarmi për të gjithë”.

Tahiri theksoi se PDK do ta ketë prioritet “çkapjen e shtetit nga bandat kriminale” dhe paralajmëroi nisma ligjore për ashpërsimin e dënimeve për armëmbajtje pa leje.

“Sot kemi rreth 250 mijë armë pa leje në duart e qytetarëve. Në legjislaturën e re, pas konsolidimit të institucioneve, do të iniciojmë ndryshime në Kodin Penal për të siguruar që kushdo që posedon apo përdor armë ilegalisht, të përballet me burgim, pa përjashtim. Kjo nuk është vetëm betejë politike, është betejë për jetën, paqen, fëmijët dhe të ardhmen e vendit”, përfundoi Tahiri, raporton albinfo.ch.