Talebanët ndalojnë gratë të punojnë, reagon OKB

(KEYSTONE/AP Photo/Zabi Karimi)

Sekretari i Përgjithshëm i Kombeve të Bashkuara, Antonio Guterres, dënoi sot ashpër vendimin e autoriteteve talebane në Afganistan për të ndaluar gratë afgane të punojnë për OKB-në dhe theksoi se ky vendim duhet të anulohet menjëherë, tha në një deklaratë zëdhënësi i tij, Stefan Dijarik.

“Kjo është një shkelje e të drejtave themelore të patjetërsueshme të grave,” tha Dijarik, raportoi Reuters.

Stafi i përbërë nga vajza dhe gra është thelbësor për operacionet e Kombeve të Bashkuara, duke përfshirë sigurimin e ndihmës për shpëtimin e jetës, thuhet në deklaratë.

“Zbatimi i këtij vendimi do të dëmtojë popullin afgan, miliona prej të cilëve kanë nevojë për këtë ndihmë,” tha ai.