Të huajt të paguajnë që fëmijët e tyre të mësojnë gjermanishten

Këtë detyrim e ka miratuar përmes votimit edhe Parlamenti Kantonal i Thurgaut, duke e futur në një pasus të Ligjit të ri për Shkollën, të votuar në nëntor të këtij viti

Edukatoret e kopshteve të fëmijëve në kantonin Thurgau gjithnjë më shpesh ankohen se fëmijët e prejardhje të huaj po kanë probleme të kuptimit të ndërsjellë. Prandaj, në rast se prindërit nuk ndërmarrin asgjë për integrimin e fëmijëve të tyre, duhet të jete shteti ai që, nën kushte të caktuara, duhet t`i detyrojë ata që përmes pagesës ta bëjnë këtë, shkruan srf.ch duke cituar drejtoren për arsim në këtë kanton, Monika Knill.

Këtë detyrim e ka miratuar përmes votimit edhe Parlamenti Kantonal, duke e futur në një pasus të Ligjit të ri për Shkollën, të votuar në nëntor të këtij viti.

Mirëpo kundër këtij vendimi është shprehur Federata e Mësuesve e Zvicrës LCH. Jürg Brühlmann, udhëheqës i seksionit pedagogjik ia mohon bazën juridike vendimit të përmendur, transmeton albinfo.ch.

«Po të shikosh kushtetutën do ta shohësh se për aktivitetet obligative shteti nuk ka të drejtë të kërkojë para. Dhe në këto aktivitete bën pjesë edhe mësimi i gjermanishtes për personat që nuk e kanë gjuhë amtare.

Veç kësaj, kjo masë do të godiste veçanërisht prindërit të cilët edhe ashtu kanë më pak para në dispozicion. Pastaj mbetet e paqartë se në bazë të çfarë kriteresh do të vendoset që të paguajnë prindërit një pjesë të kostos për mësimin plotësues të gjermanishtes”, thotë Brühlmann.

Për këto arsye LCH do ta atakojë këtë vendim duke e derguar atë në Gjykatën Federale.