Tensionet në Ngushticën e Hormuzit përshkallëzohen, rriten shqetësimet për sigurinë e transportit detar

Shkëmbimi i sulmeve mes Iranit dhe SHBA-së ka shtuar pasigurinë në një nga korridoret më të rëndësishme të energjisë në botë

Tensionet në Ngushticën e Hormuzit janë përshkallëzuar ndjeshëm pas një serie sulmesh dhe kundërsulmesh mes Iranit dhe Shteteve të Bashkuara, duke rritur shqetësimet për sigurinë e një prej rrugëve më strategjike të transportit detar në botë, përcjell albinfo.ch.

Sipas raportimeve, Garda Revolucionare Islamike e Iranit (IRGC) sulmoi tre anije tregtare në fillim të javës. Në përgjigje, ushtria amerikane kreu sulme ndaj më shumë se 80 objektivave në territorin iranian, duke synuar kapacitete ushtarake dhe infrastrukturë të lidhur me operacionet detare.

Më pas, Irani reagoi me sulme me raketa dhe dronë ndaj bazave ushtarake amerikane në Bahrein dhe Kuvajt, ndërsa shkëmbimet e zjarrit dhe retorika mes palëve kanë vazhduar, duke rritur frikën për një përshkallëzim të mëtejshëm të konfliktit.

Analistët vlerësojnë se situata ka hyrë në një fazë ku secila palë pret që kundërshtari të tërhiqet i pari. Sipas tyre, IRGC-ja synon të ndryshojë mënyrën e kontrollit të trafikut detar në Ngushticën e Hormuzit, duke pretenduar se zhvillimet e fundit ushtarake kanë krijuar një realitet të ri në rajon.

Teherani ka kërkuar që të gjitha anijet që kalojnë nëpër këtë korridor strategjik t’u nënshtrohen kontrolleve nga autoritetet iraniane, duke argumentuar se rregullat e mëparshme nuk mund të zbatohen më pas konfliktit.

Kjo kërkesë është kundërshtuar nga Shtetet e Bashkuara, vendet arabe të Gjirit dhe Organizata Ndërkombëtare Detare, të cilat e konsiderojnë të papranueshëm vendosjen e kontrollit iranian mbi një nga rrugët më të rëndësishme të tregtisë globale.

Megjithëse më herët ishin bërë përpjekje diplomatike për uljen e tensioneve dhe ishte arritur një memorandum mirëkuptimi, zhvillimet e fundit ushtarake kanë vënë në pikëpyetje vazhdimin e dialogut dhe kanë shtuar pasigurinë për lirinë e lundrimit në Ngushticën e Hormuzit, një korridor jetik për transportin ndërkombëtar të naftës dhe gazit./Albinfo.ch

---