Tërhiqen njësitë speciale në pikën 1 dhe 31, kthehet normaliteti

Ministri i Punëve të Brendshëm, Bajram Rexhepi ka konfirmuar se është arritur marrëveshja me KFOR-in për tërheqjen e njësive speciale nga pika 1 dhe 31 në veri. 

Ai ka thënë për KTV-në se njësia speciale tashmë ka kryer misionin e saj.

“Njësia speciale ka kryer misionin e vet, misioni i tyre ka qenë kthimi i ligjshmërisë në pikën 1 dhe 31”, ka theksuar Rexhepi i cili ka shtuar se tashmë   në pikat kufitare në veri do të vendosen policia e përbërë nga serbë dhe shqiptarë po ashtu edhe nga doganierët serb dhe shqiptar.

Ai ka konfirmuar se policia dhe doganierët do të asistohen nga KFOR-i, nga se sipas tij, ky misio është përgjegjës për sigurinë në vend.

Ministri i Brendshëm ka njoftuar se fillimisht policia dhe doganierët do të dërgohen në pikat kufitare  me helikopter derisa të përmirësohet gjendja në veri.

Po ashtu ai ka thënë se është dhënë një ide që policët dhe doganierët të punojnë me orar të zgjatur nga 12 në 24 orë.

Ndërsa mediat serbe raporton se rrugët në Leposaviq dhe Zubin Potok vazhdojnë të jenë të bllokuara.