Tërmeti i Meksikës “dridh” tokën edhe në Göschenen të Zvicrës

Një ngatërresë e tillë ka ndodhur, sipas Shërbimit Zviceran të Tërmeteve sepse seizmogramet në ato çaste kanë qenë të ndikuara nga dridhjet në Meksikë

Fshatin Göschenen, në afërsi të tunelit Gotthard, e ka goditur në mëngjesin e sotëm një tërmet i vogël, i shkallës 1.6 të Richterit. Si i tillë, ai praktikisht nuk është ndier nga banorët, njofton srf.ch. Por, sizmologët nga univestiteti ETH i Cyrihut, kanë regjistruar në të njëjtën kohë një tërmet të shkallës 3.0 gradë dhe njoftimi për këtë është shpërndarë automatikisht.

Kjo ka shkaktuar një alarm të rrejshëm në Göschenen, transmeton albinfo.ch. Një ngatërresë e tillë ka ndodhur, sipas Shërbimit Zviceran të Tërmeteve sepse seizmogramet në ato çaste kanë qenë të ndikuara nga dridhjet në Meksikë. Valët e ashtuquajtura të gjata, sipërfaqësore kanë ndikuar në matjen e bërë në Zvicër, duke shkaktuar kështu një shkarje të madhe në vlerësimin e magnitudës së tërmetit.

Siç dihet tashmë, tërmeti në Meksikë ka pasur një fuqi prej 8 shkallësh. Si i tillë, është më i fuqishëm se ai që kishte ndodhur në vtin 1985 kur kishte pasur mijëra viktima. Por aktualisht nuk dihet ende numri përfundimtar i viktimave të tërmetit që ka goditur Meksikën sot.