Thaçi:Kërcënimeve të Serbisë do t’u përgjigjemi si 19-vjet më parë

Ndërsa shefi i Zyrës për Kosovën në Qeverinë e Serbisë, Marko Gjuriq, ka thënë se presidenti i Kosovës, Hashim Thaçi direkt po kërcënon me armë dhe se me këtë po nxit luftë, urrejtje dhe konflikte

Presidenti Hashim Thaçi, duke folur në manifestimin “Ditët e Shqipes” në Koshare, tha se Kosova ka fituar pavarësinë dhe shtetësinë e saj falë rënies së dëshmorëve të kombit siç janë Agim Ramadani, Sali Çekaj dhe dëshmorët e tjerë të rënë në Koshare. Sipas tij, falë këtyre dëshmorëve, Kosova sot po ecë sigurt drejt integrimit evropian.

Thaçi përmendi edhe kërcënimet që, sipas tij, po vijnë nga Serbia por tha se “këtyre kërcënimeve do t’iu përgjigjemi siç iu kemi përgjigjur para 19 vjetësh”.

Kryeministri Ramush Haradinaj ka thënë se Kosova duhet të jetë pjesë e NATO-së, për t’i dhënë krahë paqes kudo në botë.“ Sipas tij rruga për lirinë e Kosovës takoi shumë tmerre të luftës dhe solli trimëri të papërsëritshme të luftëtarëve.

Ndërsa, Kryetari i Kuvendit, Kadri Veseli, ka thënë se 19 vjet më parë, nga Kosharja e deri në malet e Shalës, UÇK-ja luftonte me vendosmëri përballë makinerisë gjenocidale të Serbisë.

Manifestimi “Ditët e Shqipes” është mbajtur  për nder të 19 vjetorit të Betejës së Koshares, e cila përfundimisht theu kufirin në mes tokave shqiptare.

E Shefi i Zyrës për Kosovën në Qeverinë e Serbisë, Marko Gjuriq, ka thënë se presidenti i Kosovës, Hashim Thaçi direkt po kërcënon me armë dhe se me këtë po nxit luftë, urrejtje dhe konflikte.