“The Guardian”, për festivalin shqiptar

Festivali “Unum” në Shqipëri, që sivjet do të ketë edicionin e parë, është përzgjedhur në mesin e 20 festivaleve më të mira të muzikës në Evropë për vitin 2019, nga prestigjiozja “The Guardian”.

“The Guardian” ka thënë se DJ-të më të mirë do të jenë pjesë e festivalit në plazhin Rana e Hedhun në Shëngjin në fund të muajit maj.

“Unum” do të mbahet nga 31 maji deri më 3 qershor.

“‘Unum’ është festival i ri që shpreson ta vendosë Shqipërinë në rrjetin e festivaleve, pas suksesit të Kalasë në vitin 2018, mes shumë të tjerave në vitet e fundit”, thuhet në hyrje të shpjegimit të “Guardianit” për këtë festival.

Aty theksohet se bregdeti e birra e lirë vazhdojnë të tërheqin njerëzit në rivierën shqiptare, këtë herë te Rana e Hedhun me sfond malor. “The Guardian” thekson se do të ketë edhe hapësira për punë arti, salla ushqimore, hapësirë për yoga e volejboll plazhi.

Bullgaria, Rumania, Gjermania, Islanda, Sllovakia, Polonia, Sicilia, Italia, Kroacia, Belgjika, Franca, Spanja, Hungaria, Irlanda, Portugalia, Norvegjia, Zvicra, Holanda e Danimarka janë vendet e tjera që përbëjnë këtë listë.