Thirrja nga Izraeli shpëton alpinistët në Ticino

“Rega” ka evakuuar një grup prej nëntë alpinistësh të premten në mbrëmje nga mali Corona di Redòrta në Ticino. Të rinjtë u befasuan nga moti i keq dhe rënia e temperaturës.

Të nëntë personat nga Izraeli dhanë alarmin rreth orës 17:00, përmes një pajisjeje satelitore të thirrjeve urgjente, u bë e ditur të shtunën nga organizata e shpëtimit.

Thirrja e tyre për ndihmë u përcoll në një qendër të thirrjeve urgjente në Izrael, e cila më pas kontaktoi qendrën operative të Rega, shkruan RTS.

Një fluturim i parë kërkimor i kryer nga ekuipazhi i Rega nga Locarno (TI) ishte i pasuksesshëm. Por, një nga alpinistët më vonë ishte në gjendje t’i përcillte një foto organizatës së shpëtimit, e cila ndihmoi në përcaktimin e vendndodhjes së saktë të grupit.

Me ndihmën e dy specialistëve nga Swiss Alpine Rescue dhe një helikopter shtesë nga Eliticino Tarmac, alpinistët më në fund mundën të transportoheshin në luginë. Ata nuk ishin lënduar, por në gjendje hipotermie, përcjell albinfo.ch.