Thirrje kontrollorëve të trafikut ajror që të ndërpresin grevën

Foto: Bujar Gashi

Autoriteti i Aviacionit Civil i Kosovës (AACK) thotë se është duke e përcjellë për së afërmi situatën e krijuar në sektorin e aviacionit civil në përgjithësi dhe në veçanti sigurinë e operimeve ajrore në ANP “Adem Jashari” me rastin e vazhdimit të grevës së kontrollorëve të trafikut ajror të Agjencisë së Shërbimeve të Navigacionit Ajror.

AACK thotë se bashkëndiejnë me udhëtarët, të cilët janë të shqetësuar për grevën që është duke u mbajtur.

“AAC-ja shpreh keqardhje që kontrollorët e trafikut ajror në Agjencinë e Shërbimeve të Navigacionit Ajror  kanë vendosur të vazhdojnë grevën, me gjithë dedikimin tonë dhe të Ministrisë së Infrastrukturës dhe Transportit për trajtimin e tyre sipas rëndësisë së kontrollorëve të trafikut ajror, mungesës së tyre në tregun e punës dhe specifikat e punës që argumentojnë një trajtim ndryshe nga shërbyesit e tjerë civilë”.

“AAC-ja u bën thirrje kontrollorëve të trafikut ajror që të ndërprenë e grevën, duke pasur parasysh pasojat e mëdha për publikun që udhëton dhe humbjet e tjera direkte e indirekte që mund të shkaktohen”, shkruan AACK-ja në komunikatën e dërguar, shkruan kk, përcjell albinfo.ch.

AAC-ja shpreson që palët të arrijnë një konsensus sa më të shpejtë, në mënyrë që operimet ajrore të bëhen sipas orarit të planifikuar dhe të mos dëmtohen edhe më tej udhëtarët dhe funksionimi normal i ANP “Adem Jashari”.