Tre të vdekur në dy aksidente

Tre persona kanë vdekur në dy aksidente të ndara që kanë ndodhur mbrëmjen e së martës në rrugën Prishtinë-Pejë, afër Komoranit.

Fillimisht, sipas policisë, rreth orës 20:00 një veturë dyshohet se ka humbur kontrollin dhe është vetëaksidentuar, ku kanë mbetur dy të vdekur, përcjell albinfo.ch.

Ndërsa, në afërsi të këtij lokacioni, pak minuta më vonë ka ndodhur edhe një aksident tjetër mes një kamioni dhe autoambulance, ku ka vdekur një person.

“Njësitet policore dhe të emergjencës po ndërmarrin veprimet e nevojshme në vend të ngjarjes për të identifikuar rrethanat se si kanë ndodhur të dyja rastet. Është njoftuar prokurori dhe hetimet për këto dy raste të rënda janë në proces. Edhe një herë policia apelon te të gjithë drejtuesit e automjeteve që të kenë kujdes më të madh gjatë drejtimit të automjeteve, sidomos gjatë ndryshimeve të kushteve atmosferike dhe zvogëlimit të dukshmërisë”, ka thënë zëdhënësi i Policisë, Daut Hoxha.