U mbajt tryeza kushtuar LSHP dhe 100 vjetorit të pavarësisë së Shqipërisë

Temat e tryezës ishin: “Lidhja Shqiptare e Prizrenit dhe çështja kombëtare” dhe “100 vjetori i shpalljes së pavarësisë së Shqipërisë”

Në shenjë nderimi të dy datave me rëndësi historike dhe kombëtare, 134-Vjetorit të Lidhjes Shqiptare të Prizrenit  dhe 100 Vjetorit të Pavarësisë së Shqipërisë, Bashkësia e Intelektualëve Shqiptarë në Zvicër (BISHZ) më 16 qershor organizoi tryezën, në Solothurn me temat: “Lidhja Shqiptare e Prizrenit dhe çështja kombëtare” dhe “100 vjetori i shpalljes së pavarësisë së Shqipërisë”.

Në këtë tryezë, me punimet e tyre i kanë paraqitur Dr. Nikë Gjeloshi, Dr.Sc.Ahmet Xhigoli, Gani Qarri, Abas Fejzuillahi dhe Mr.Sc. Metush Zenuni. Është lexuar edhe tema e Skënder Zogajt, nga Prishtina,i cili nuk ka pasur mundësi të merrte pjesë në tryezë.

Në fjalën e tij, kryetari i BISHZ  në mes tjerash ka thënë se 100 Vjetori i shtetit shqiptar, kujtohet, nderohet dhe shënohet këtë vit përmes këtij organizimi të BISHZ.

Sipas tij, të gjitha temat e paraqitura nga referuesit kanë një të përbashkët: dëshirën dhe kërkesën për bashkimin e të gjithë shqiptarëve në një shtet dhe nën një flamur, në hapësirat e Shqipërisë natyrale. Ky bashkim duhet të realizohet në formë demokratike dhe duke shfrytëzuar të drejtën për vetëvendosje, ka vlerësuar ai.

Në debat ka marrë pjesë edhe konsulli i Kosovës në Bernë, Xhafer Ahmeti,  i cili ka folur si historian, me theks të veçantë rreth Lidhjes Shqiptare të Prizrenit.

Në këtë tryezë, me punimet e tyre janë paraqitur: Dr. Ahmet Gjikolli: „Lidhja e Prizrenit, një ngjarje me vlera historike për kombin shqiptar“;  Dr. Nikë Gjeloshi: „Lidhja e Prizrenit ide e parealizuar“; Gani Qarri: „Lidhja Kombëtare e Prizrenit“; Abas Fejzullahi: „Veprimet e vendorëve dhe të huajve në 100 vjetorin e Shtetit Shqiptar“; Mr. Sc. Metush Zenuni: „Lëvizjet Politiko – Ushtarake në Kosovë 1981 -1999“ dheSkënder Zogaj: „Mehmet Pashë Dërralla – gjenerali dhe ministri i parë i ushtrisë shqiptare“.