Udhëtimet charterë janë rritur 306 % në Shqipëri

Sipas të dhënave zyrtare, Italia zotëron përqindjen më të madhe në tregun e transportit ajror për muajin prill 2019

Shqipëria, një destinacion i preferuar për pushime, po nxit tregun e udhëtimeve ajrore përmes çarterëve me turistë.

Referuar të dhënave zyrtare të ardhura në Autoritetin e Aviacionit Civil nga Aeroporti Ndërkombëtar “Nënë Tereza”, shifrat tregojnë një numër prej 239.465 pasagjerësh, të cilët kanë udhëtuar gjatë muajit prill për/nga TIA.

Për sa i përket rritjes/rënies së fluksit të lëvizjes së pasagjerëve për muajin prill 2017-2018-2019, vihet re se numri i pasagjerëve që kanë fluturuar me Charter ka shënuar rritje prej 306 %, transmeton ATSH.

Sipas të dhënave zyrtare, Italia zotëron përqindjen më të madhe në tregun e transportit ajror për muajin prill 2019, duke zënë 56% të totalit dhe një numër prej 132.769 pasagjerësh, ndjekur nga Turqia me 7%, Austria me 7%, si dhe Hungaria 6%, përcjell albinfo.ch.

Nëse do të bënim krahasimin e tre vjetëve të fundit, trafiku ajror dhe fluksi i pasagjerëve këtë vit, gjatë prillit të 2019-ës ka një rritje prej 13% krahasuar me vitin 2018.

---