Universitetet publike në Kosovë, 42 programe më pak

Rektorët e universiteteve publike kanë paralajmëruar grevë dhe protesta nëse deri më 28 janar nuk shkarkohet Këshilli Shtetëror i Cilësisë, pasi ata kanë shprehur pakënaqësi me vendimet që këshilli i ka marrë së fundi për programet studimore.

Në një mbledhje të jashtëzakonshme të Komisionit parlamentar për arsim, rektorët kanë thënë se bordi në mënyrë të jashtëligjshme ua tërhoqi akreditimet e programeve, të cilat kishin akreditim edhe për një kohë të gjatë. 

Rektori i UP-së, Marjan Dema, ka thënë se KSHC-ja i mori vendimet ad-hoc, pa bërë fare monitorim vlerësues të këtyre programeve. Rektorët kanë shprehur dyshime se qëllimi i këtyre vendimeve të KSHC-së është që të mbyllen universitetet publike të themeluara pas luftës.

Këshilli Shtetëror i Cilësisë ka marrë vendim për mbylljen e 42 programeve në këto universitete. Për këtë vendim, në Komisionin parlamentar për arsim të premten pritet të raportojnë anëtarët e Bordit të Agjencisë së Akreditimit.