Universitetet zvicerane do të rishikojnë bashkëpunimin me universitetet ruse

(KEYSTONE/Gaetan Bally)

Universitetet zvicerane duhet të rishqyrtojnë bashkëpunimet e tyre shkencore me universitetet në Rusi dhe t’i pezullojnë ato nëse është e nevojshme, tha organi ombrellë i sektorit, përcjell albinfo.ch.

“Kur marrëveshjet politike dhe rregullat e diplomacisë anashkalohen në mënyrë të njëanshme, shumë fusha në shkencë mbeten të lidhura përmes një kuptimi të përbashkët të lirisë shkencore dhe integritetit akademik. Ky bashkëpunim shkencor nuk duhet të shërbejë për të mbështetur politikën agresive të qeverisë ruse, e cila me këtë luftë agresioni shkel parimet themelore të të drejtave të njeriut, të drejtën ndërkombëtare dhe vlerat themelore evropiane”, thuhet në një deklaratë të universiteteve zvicerane të mërkurën.

“Në këtë kuptim, Bordi i universiteteve zvicerane rekomandon që universitetet zvicerane të rishikojnë bashkëpunimet e tyre shkencore me universitetet në Rusi dhe t’i pezullojnë ato aty ku ekziston një rrezik i tillë”, përcjell tutje albinfo.ch.