Ushtarët e Kosovës kthehen nga misioni në Kuvajt

Ushtarë të Republikës së Kosovës të cilët kohë më parë shkuan në mision ushtarak në Kuvajt, u kthyen sot në Kosovë.

Ata u pritën nga ministri i mbrojtjes së Kosovës Armend Mehaj. Ky i fundit, në një shkrim në Facebook tha se ishte një emocion i veçantë të priste ushtarët e Forcës së Sigurisë së Kosovës që sot janë kthyer nga misioni i parë ushtarak jashtë vendit.

“Emocion i veçantë ishte pritja e ushtarakëve tanë, që u kthyen sot nga misioni i parë ushtarak i FSK-së jashtë vendit. Këta djem, me shërbimin e tyre përkrah forcave amerikane në operacionin e stabilitetit në Kuvajt, na bënë krenar, jo vetëm qytetarët e Republikës së Kosovës, por edhe gjithë kombin. Ju faleminderit djema, juve dhe familjeve tuaja, për sakrificën në shërbim të paqes, stabilitetit dhe sigurisë globale! Ju konfirmuat në vepër, vlerën e shenjtë të Besës sonë për mikun! Ju në vepër shprehët falënderimin dhe mirënjohjen për atë që SHBA dhe gjithë vendet tjera aleate, bënë për ne në kohët e vështira!”, ka shkruar Mehaj, transmeton Albinfo.ch.