Ushtria Zvicerane donte t`i shiste në Afrikë maskat me cilësi të dyshimtë

Zvicra kishte planifikuar t`i shiste në Afrikë maskat ​​me cilësi të pakënaqshme. Kjo del nga një "raport i statusit" i lëshuar nga ushtria më 13 qershor 2020

“Tani jemi duke shqyrtuar një ofertë për të shitur të gjitha maskat tona FFP2 që nuk plotësojnë standardin zviceran (…) në tregun afrikan”.

Kështu kishte shkruar Brigadieri Markus Näf, koordinator i prokurimit në Departamentin e Mbrojtjes, Mbrojtjes Civile dhe Sportit (VBS), në raportin të cilin e ka në dispozicion Agjencia e lajmeve Keystone-SDA.

Näf në vazhdim kishte shkruar se ushtria ishte e gatshme t`i shiste këto maska ​​nën çmimin e tyre të kostos, transmeton albinfo.ch. Kjo, për faktin se ato nuk mund të shiten më në Zvicër pasi të ketë skaduar rregullorja përkatëse Covid.

Por, “në fund të fundit, asnjë maskë nuk është dërguar në Afrikë”, ka thënë një zëdhënës i ushtrisë me kërkesë të agjencisë së përmendur të lajmeve.

“Maskat në fjalë nuk janë të dëmtuara. Në shumë vende të botës ato janë dhe do të mbesin të lejuara për përdorim”, ka vazhduar zëdhënësi i ushtrisë.

Ndërkaq, maskat që nuk miratohen më në Zvicër sipas rregullave të reja, hidhen në mbeturina.

---