Vaksinimi i detyrueshëm për mësuesit në qytetin e Nju-Jorkut

Mësimdhënësve iu tha se nuk do të jetë e mundur më që të zgjedhin të testohen çdo javë

Nju-Jorku njoftoi sot se do ta bëjë të detyrueshëm vaksinimin për stafin në shkollat ​​e tij publike, përfshirë mësuesit dhe drejtorët, ndërsa qyteti po përpiqet të ngadalësojë transmetimin e variantit shumë më ngjitës Delta.

“Të gjithë punonjësit e Departamentit të arsimit duhet të marrin të paktën një dozë vaksine antiCOVID-19 deri më 27 shtator”, tha kryebashkiaku Bill de Blasio, transmeton Afp, përcjell Albinfo.ch.

“Nuk do të jetë e mundur më që të zgjidhni të testoheni çdo javë”, vazhdoi de Blasio.

“Ne e dimë se kjo do të ndihmojë të sigurohemi që të gjithë të jenë të sigurt”, shtoi ai për gazetarët.

Qyteti i Nju-Jorkut ka sistemin më të madh shkollor në SHBA, me 1,1 milion studentë në 1 800 shkolla.

Kjo direktivë e re do të prekë gati 150,000 punonjës.

Rreth 63 për qind e stafit arsimor janë të vaksinuar, ndërsa 75,6 për qind e të rriturve në qytetin e Nju-Jorkut, ku jetojnë tetë milionë persona, kanë marrë të paktën një dozë të vaksinës, tregojnë shifrat zyrtare.

 

---