Vala e të nxehtit godet Zvicrën, temperaturat pritet të arrijnë deri në 38 gradë

Temperaturat deri në 38 gradë, vala e vapës përfshin Zvicrën nga e mërkura

Meteorologët paralajmërojnë vapë ekstreme nga e mërkura, me temperatura që në disa rajone do të kalojnë 35 gradë, ndërsa në Bazel priten deri në 38°C, përcjell albinfo.ch.

Zvicra po përgatitet për një nga periudhat më të nxehta të këtij viti, pasi nga e mërkura pritet të nisë një valë intensive e të nxehtit që do të përfshijë pothuajse të gjithë vendin.

Sipas parashikimeve meteorologjike, temperaturat do të kalojnë kufirin e 30 gradëve në shumë rajone, ndërsa në disa zona do të arrijnë deri në 35 gradë Celsius.

Më së shumti pritet të preket rajoni i Bazelit, ku termometri mund të shënojë deri në 38 gradë Celsius, duke e bërë atë zonën më të nxehtë të vendit gjatë kësaj vale të vapës.

Edhe pjesë të tjera të Zvicrës do të përballen me temperatura shumë të larta, me kushte tipike verore dhe net gjithnjë e më të ngrohta.

Meteorologët bëjnë të ditur se gjatë ditëve të ardhshme moti do të mbetet kryesisht i thatë dhe me diell në pjesën më të madhe të territorit zviceran. Megjithatë, të premten priten stuhi lokale, veçanërisht në rajonet perëndimore të vendit.

Autoritetet u rekomandojnë qytetarëve të shmangin ekspozimin e zgjatur në diell gjatë orëve më të nxehta të ditës, të konsumojnë sa më shumë lëngje dhe t’u kushtojnë vëmendje të veçantë fëmijëve, të moshuarve dhe personave me probleme shëndetësore./Albinfo.ch

---