Variant i ri i meningjitit shkakton alarm në Britani

(KEYSTONE/Leandre Duggan)

Një shpërthim i një forme agresive të meningjitit ka ngritur shqetësim në Kent të Britanisë së Madhe, ku dy studentë kanë humbur jetën, ndërsa 11 persona të tjerë ndodhen në gjendje të rëndë në spital.

Pamjet nga vendi i ngjarjes tregojnë njerëz që presin në radhë për të marrë antibiotikë si masë parandaluese, ndërkohë që të paktën tre shkolla kanë konfirmuar raste të infektimit. Autoritetet shëndetësore po punojnë me urgjencë për të identifikuar personat që mund të kenë pasur kontakt me të infektuarit, me qëllim ndalimin e përhapjes së sëmundjes.

Sipas mediave britanike, varianti i identifikuar është një formë e meningjitit B (Men B), një infeksion serioz që mund të bëhet fatal brenda pak orësh.

Mes viktimave është një nxënëse 18-vjeçare, Juliette Kenny, e cila ndërroi jetë të shtunën pasi u infektua me bakterin e rrezikshëm. Po ashtu, një student 21-vjeçar nga Universiteti i Kentit ka vdekur si pasojë e të njëjtës sëmundje.

Hetimet janë përqendruar edhe te një klub nate në Canterbury, Club Chemistry, ku shumë persona mund të jenë ekspozuar ndaj infeksionit. Autoritetet kanë kërkuar që të gjithë ata që kanë qenë në këtë lokal më 5, 6 ose 7 mars të paraqiten për trajtim parandalues me antibiotikë.

Ekspertët e shëndetit publik janë të shqetësuar për mundësinë e përhapjes së sëmundjes edhe jashtë rajonit të Kentit. Megjithatë, sipas Agjencisë së Sigurisë Shëndetësore të Mbretërisë së Bashkuar, rastet deri tani janë përqendruar kryesisht në zonën e Canterbury dhe Kent.

Rreth 16 mijë studentë dhe staf universitar kanë marrë udhëzime shëndetësore, ndërsa autoritetet po ndërmarrin masa emergjente për të frenuar përhapjen e infeksionit.

Mjekët theksojnë se meningjiti nuk përhapet lehtësisht dhe zakonisht kërkon kontakt të ngushtë dhe të zgjatur mes njerëzve, si përmes kollitjes, teshtimës, puthjes ose përdorimit të përbashkët të enëve.

Personat që kanë pasur kontakt me të infektuarit këshillohen të paraqiten për trajtim edhe nëse nuk shfaqin simptoma. Shenjat kryesore të sëmundjes mund të përfshijnë temperaturë të lartë, të vjella, dhimbje të forta koke dhe skuqje në trup.

Autoritetet shëndetësore po vazhdojnë hetimet dhe po intervistojnë të prekurit dhe familjarët e tyre për të identifikuar kontaktet e mundshme dhe për të parandaluar përhapjen e mëtejshme të infeksionit.