Varone, trajtim i favorizuar nga autoritetet turke

Të huajt tjerë të cilëve do t`u kapeshin objekte të tilla, do të mbaheshin ndoshta me muaj në burgjet turke

Lirimi i shpejtë nga organet turke i komandantit të policisë së kantonit të Valisit, Christian Varone ka ngjallur interesim në opinionin e Zvicrës. Kjo, për faktin se Turqia ka legjislacion dhe praktikë shumë të ashpër sa i përket veprave të ngjashme. Të përkujtojmë. Disa ditë më parë, kur Varone kishte mbaruar pushimet në Antalia të Turqisë, qe ndaluar në aeroport pasi që në valixhe i ishte gjetur një gur , që sipas pretendimeve të autoriteteve, kishte vlerë arkeologjike.

Avokatja turke e Varones ka thënë për mediet zvicerane se klienti i saj është trajtuar në mënyrë shumë të favorizuar në krahasim me personat tjerë që akuzohen për vepra të ngjashme. Të huajt tjerë të cilëve do t`u kapeshin objekte të tilla në bagazh, do të mbaheshin me javë e ndoshta me muaj në burgjet turke, ka thënë ajo në një emision lajmesh të televizionit publik të Zvicrës.

Po ashtu ajo ka theksuar se në këtë rast nuk është kërkuar as kaucion, nuk ka pasur masa vëzhgimi dhe as ndalim udhëtimi nga autoritetet turke. Sipas saj, Varone, gurin në fjalë e kishte gjetur në fushë dhe nuk kishte ditur nëse ai kishte ndonjë vlerë arkeologjike.

Komandanti i Policisë së Kantonit të Valisit, Christian Varone qe bërë i njohur muaj më parë për menaxhimin e suksesshëm të fatkeqësisë së rëndë që kishte ndodhur në kantonin e tij, me ç`rast patën gjetur vdekjen një numër i madh nxënësish belgë që ishin në ekskursion në Zvicër. Me këtë veprim ai kishte merituar ofiqin “heroi i Valisit”, nga mediet zvicerane.