Varroset zv.ministri kosovar i diasporës, vdiq nga orteku në Brezovicë

Foto: Lajmi.net

I është dhënë lamtumira e fundit zv.ministrit te Diasporës, Arian Daci i cili një ditë më parë vdiq nga një ortek bore në qendrën e skijimit në Brezovicë. Ndërsa më herët u bënë homazhe në hollin e Kuvendit të Kosovës për vdekjen e zv.ministrit ku morën pjesë qytetarë të shumtë e drejtues të institucioneve e partive politike është mbajtur edhe akademi përkujtimore për nder të tij, përcjell albinfo.ch.

Ministri i Diasporës i Kosovës, Dardan Gashi, ka ngushëlluar edhe njëherë familjen Daci për humbjen e djalit të tyre Arianit. “Ky fjalimi është më i rëndi gjatë gjithë karrierës sime. Nuk ka fjalë që përshkruajnë dhimbjen që po kalojmë nga kjo tragjedi. Nuk po mund të besoj që këto fjalë janë ngushëlluese dhe përshëndetje me Arianin”, tha ai.

Ndërsa motra e tij Edi Daci-Prapashtica, falënderoi të gjithë për ngushëllimet dhe përkrahjen gjatë kësaj kohe të vështirë për ta.

Arian Daci, 40-vjeçar, djali i vetëm i Kryetarit të Akademisë së Shkencave dhe Arteve të Kosovës, ka vdekur të shtunën në Brezovicë.