Vaud refuzon t’u japë të huajve të drejtën e votës në nivel kantonal

@Freepik

Shtetasit e huaj që jetojnë në kantonin Vaud nuk do të mund të votojnë në zgjedhjet kantonale. Iniciativa që synonte t’u jepte këtë të drejtë u refuzua të dielën me 63.61% të votave kundër. Ndërkohë, një tjetër ndryshim u miratua: banorët e Vaud-it që jetojnë jashtë vendit do të kenë të drejtën të zgjedhin Këshillin e Shtetit.

Iniciativa, e nisur nga lëvizja qytetare Ag!ssons dhe e mbështetur nga e majta, kërkonte që të huajt – ashtu si në nivel komunal që nga viti 2003 – të merrnin pjesë në zgjedhjet kantonale, me kusht që të kishin jetuar të paktën 3 vite në kanton dhe 10 vite në Zvicër, transmeton albinfo.ch.

Por popullsia e Vaud-it zgjodhi të ruajë sistemin aktual, duke e refuzuar ndryshimin, ashtu si në vitin 2011, kur një iniciativë e ngjashme u rrëzua me afro 70% kundër.

Ky rezultat përbën një fitore për FDP-në dhe SVP-në, të cilat, së bashku me Lidhjen e Vaud-it, kundërshtuan iniciativën me argumentin se e drejta e votës në nivel kantonal duhet të mbetet e lidhur ngushtë me shtetësinë zvicerane.