Vazhdon aksioni lidhur me rastin “Brezovica”

Prokuroria jep detaje për aksionin “Brezovica”, bastisje në autosallone, shtëpi e lokale

Sot, Prokuroria Themelore në Ferizaj njofton se në bashkëpunim me Policinë e Kosovës, Administratën Tatimore të Kosovës (ATK) dhe Doganën e Kosovës, në bazë të urdhëresës së lëshuar nga Gjykata Themelore në Ferizaj për lëshimin e urdhëresës për kontroll dhe sekuestrim te përkohshëm të shtëpive, lokaleve përcjellëse dhe auto salloneve, është duke e realizuar një aksion, i cili ka rrjedhur në kuadër të hetimeve lidhur me rastin “Brezovica”, përcjell albinfo.ch.

Gjatë aksionit janë kontrolluar dhe bastisur disa autosallone, shtëpi dhe lokale përcjellëse në lokacione të ndryshme në Prishtinë, Ferizaj, Vushtrri dhe Lipjan.

“Me ç’rast gjatë këtij aksioni janë kontrolluar dhe bastisur disa autosallone, shtëpi dhe lokale përcjellëse në lokacione të ndryshme, konkretisht në qytetin e Prishtinës, Ferizajt, Vushtrisë dhe Lipjanit, për shkak të dyshimit të veprave penale “Fajde” nga neni 331 par.3 lidhur me par. 1 të Kodit Penal të Republikës së Kosovës, “Shmangia nga tatimi” nga neni 307 par.1 lidhur me par 3 të KPRK-së dhe “Detyrimi” nga neni 328 par.2 të KPRK-së”, thuhet në njoftimin e Prokurorisë.

Po ashtu nga Prokuroria Themelore në Ferizaj bëhet e ditur se në lidhje me këtë aksion do të ketë informacione shtesë në vazhdimësi.

 

 

 

 

---