Vdes shkrimtari Umberto Eco

Ka vdekur mbrëmë në moshën 84 vjeçare shkrimtari dhe filozofi i shquar italian Umberto Eco. Siç njoftojnë mediet italiane duke iu referuar familjarëve të tij, shkrimtari i madh ka ndërruar jetë  rreth ores 22.30 të të premtes.

Shkrimtari , linguisti dhe filozofi qe bërë i njohur në nivel botëror me romanin e tij të parë “Emri i trëndafilit”, të botuar në vitin 1980. Ky roman pastaj qe filmuar dhe e kishte bërë te njohur autorin edhe në shtresat më të gjera.

Eco konsiderohej si njëri ndër autoritetet më të mëdha në fushën e letërsisë dhe mendimit njerëzor të dekadave të fundit.

Romani i ij “Emri i trëndafilit” është përkthyer edhe në gjuhën shqipe dhe ka një rreth të gjerë lexuesish ndër shqiptarët.

Përveç këtij romani, ai ka botuar edhe romanet si “Lavjerrësi i Fukosë” (1988), “Ishulli i ditës së kaluar” (1994), “Baudolino” (2000) etj.

Është interesante se, me gjithë faktin se prej kohësh konsiderohej një ndër autoritetet më të larta letrare në botë, Umberto Eco nuk e ka fituar çmimin Nobel për letërsi.

Eco ka lindur më 5 janar të vitit 1932  si i biri i një kontabilisti në qytetin italian të veriut, Alessandria.